Site icon

एसटीचा प्रवास महागला ; आजपासून हंगामी भाडेवाढ

नाशिक : पुढारी वृत्तसेवा
सन 2022 च्या दिवाळी हंगामासाठी महाराष्ट्र राज्य मार्ग परिवहन महामंडळाने शुक्रवार (दि.21) पासून परिवर्तनशील अर्थात हंगामी भाडेवाढ लागू केली आहे. ही भाडेवाढ 31 ऑक्टोबरपर्यंत कायम राहणार असून, ऐन सणासुदीच्या काळात एसटीचा प्रवास महागल्याने प्रवाशांच्या खिशाला झळ बसणार आहे. या भाडेवाढीमुळे प्रवाशांना जिल्ह्यांतर्गत प्रवासासाठी साधारणतः 10 रुपये, तर आंतरजिल्हा प्रवासासाठी 40 ते 50 रुपये जादा मोजावे लागणार आहेत.

दिवाळी सुट्यांमध्ये वाढणारी प्रवासी संख्या लक्षात घेऊन ही संधी साधण्यासाठी एसटी महामंडळाने यंदाच्या दिवाळी सुट्यांमध्ये हंगामी दरवाढ करण्याचा निर्णय घेतला आहे. या मोसमात खासगी वाहतूकदारही अवाच्या सव्वा भाडेवाढ करून वाहतूक करतात. मात्र, तेवढे दर न वाढवता साध्या व निमआराम बसेसच्या तिकीटदरात 10 टक्के आणि शिवशाही दरांमध्ये सुमारे 12 टक्के एवढी दरवाढ करण्यात आली आहे. ही दरवाढ केवळ दिवाळीच्या सुटीपुरतीच लागू असेल. त्यामुळे प्रवाशांना एसटीने प्रवास करताना खिसा काहीसा हलका करावा लागणार आहे. दरम्यान, दिवाळीच्या काळात होणारी संभाव्य गर्दी लक्षात घेता, प्रवाशांनी आगाऊ आरक्षणाला प्राधान्य दिले आहे. दिवाळी हंगामात परिवर्तनशील भाडे आकारणीसंदर्भात एसटी महामंडळाने परिपत्रक जारी केले आहे. त्यात तालुकांतर्गत तसेच आंतरजिल्हा प्रवासी वाहतुकीसाठी यापूर्वीचे भाडे व हंगामातील भाड्याचा तपशील नमूद केलेला आहे. महामंडळाच्या संकेतस्थळावर दिवाळीच्या काळातील गाड्यांच्या आरक्षणासाठी हे नवे दर लागू असल्याचे स्पष्ट करण्यात आले आहे.

अशी असेल हंगामी भाडेवाढ

मार्ग                              सध्याचे भाडे                                               नवीन भाडे
पासून          पर्यंत            साधी       शिवशाही                                    साधी               शिवशाही
कळवण       नाशिक            125            00                                         135                    00
येवला         नाशिक             130           00                                         145                    00
लासलगाव  नाशिक             105           00                                         115                     00
नाशिक      पुणे                  315           365                                        345                    515
नाशिक     बोरिवली            270           400                                        300                      445
नाशिक    औरंगाबाद         295           440                                          325                     485
नाशिक    धुळे                 235            350                                         260                    390

The post एसटीचा प्रवास महागला ; आजपासून हंगामी भाडेवाढ appeared first on पुढारी.

Exit mobile version