मुलीला जन्म दिल्याचे भाग्य पदरात घेत माता देवाघरी! सिव्हिल हॉस्पिटलमधील संतापजनक प्रकार

नाशिक : मध्यरात्री त्या मातेने मुलीला जन्मही दिला. मात्र त्यानंतर हा आनंद फार काळ टिकला नाही. सिव्हिल हॉस्पिटलमधील संतापजनक प्रकारामुळे नातेवाईकांनी हॉस्पिटल प्रशासनावर गंभीर आरोप केले आहेत. 

 सिव्हिल हॉस्पिटलमधील संतापजनक प्रकार; नातेवाईकांचा आरोप

इगतपुरी तालुक्यातील शांताबाई ज्ञानेश्वर सावंत या प्रसूतीसाठी ग्रामीण रुग्णालयात दाखल झाल्या होत्या. परंतु, तपासणीनंतर त्यांना सिव्हिल हॉस्पिटलला घेऊन जाण्यास सांगण्यात आले. त्यानुसार त्यांच्या पतीने ४ फेब्रुवारी रोजी त्यांना सिव्हिल हॉस्पिटलमध्ये दाखल केले. मध्यरात्री त्यांनी मुलीला जन्म दिला. प्रसूतीनंतरही त्यांच्या पोटात खूप दुखत होते, याची माहिती शांताबाई यांनी, डॉक्टर, परिचारीका आणि पतीलाही दिली. परंतु, तिच्या त्रासाकडे डॉक्टर व परिचारिकांनी दुर्लक्ष केल्याचा आरोप पतीने केला आहे.

तासाभरातच खेळ संपला

सावंत यांनी इगतपुरीचे आमदार हिरामण खोसकर यांना माहिती देऊन मदत मागितली. खोसकर यांनी सिव्हिल हॉस्पिटल प्रशासनाला फोन केल्यानंतर शांताबाई यांच्या पुढील तपासण्या व उपचार करण्यात आले. त्यांना अतिदक्षता विभागात दाखल करण्यात आले. परंतु, त्यानंतर तासाभरातच त्यांचा मृत्यू झाला.

हेही वाचा- रस्त्यावर फेकलेली 'नकोशी' झाली 'हवीशी'! नुकत्याच जन्मलेल्या शकुंतलाला मिळाले आई-बाबा

नातेवाईकांचे गंभीर आरोप; मृतदेह ताब्यात न घेण्याचा पवित्रा

डॉक्टरांनी केलेल्या दुर्लक्षामुळेच शांताबाई यांचा मृत्यू झाल्याचा आरोप त्यांच्या नातलगांनी केला आहे. शांताबाईंचे शवविच्छेदन बाहेरील डॉक्टरांच्या उपस्थितीत इनकॅमेरा करावे, अशी मागणी महिलेच्या नातेवाईकांनी केली. तसे निवेदन सरकारवाडा पोलिसांना देण्यात आले. त्यानुसार शांताबाईंच्या मृतदेहाचे विच्छेदन करण्यात आले. मृत्यूस कारणीभूत ठरणाऱ्यांवर गुन्हा दाखल होत नाही, तोपर्यंत मृतदेह ताब्यात न घेण्याचा पवित्रा नातेवाईकांनी स्वीकारल्याने तणावाचे वातावरण निर्माण झाले. अखेर या मृत्यूप्रकरणी चौकशी करण्यासाठी समिती नेमावी, असे विनंतीपत्र जिल्हा शल्य चिकित्सक डॉ. रत्ना रावखंडे यांनी आरोग्य उपसंचालकांना दिल्यानंतर नातेवाइकांनी मृतदेह ताब्यात घेतला.

हेही वाचा - अखेर त्या 'बालिकावधू'ची मृत्युशी झुंज संपली; विवाह तिच्यासाठी ठरला मृत्यूचे फर्मानच

हॉस्पिटलमध्ये काही काळ तणावाचे वातावरण

सिव्हिल हॉस्पिटलमध्ये प्रसूती पश्चात महिलेचा मृत्यू झाल्याची घटना घडली आहे. डॉक्टर व परिचारिकांनी दुर्लक्ष केल्याने मृत्यू झाल्याचा आरोप करीत महिलेच्या नातेवाइकांनी मृतदेह ताब्यात घेण्यास नकार दिला. यामुळे हॉस्पिटलमध्ये काही काळ तणावाचे वातावरण होते. चौकशीसाठी समिती नेमण्याची ग्वाही हॉस्पिटल प्रशासनाने दिल्यानंतर नातलगांनी मृतदेह ताब्यात घेतला.