जळगाव : भरधाव वेगाने जाणाऱ्या बसने समोरील कंटेनरला जोरदार धडक दिल्याने अपघात झाल्याची घटना भुसावळ रोडवर घडली. यात ४० प्रवासी जखमी झाले असून, यात काही विद्यार्थ्यांचाही समावेश आहे. अपघाताची माहिती मिळताच पोलिसांनी घटनास्थळी धाव घेत, जखमींना उतरवून जिल्हा सामान्य रुग्णालयात उपचारासाठी रवाना केले.
याबाबत सविस्तर असे की, जळगाव येथून भुसावळकडे निघालेली बस (एम.एच. २०, बीएल.०९४७) ला मार्गातच रिलायन्स पेट्रोल पंपाजवळ अपघात झाला. महामार्गावर कंटेनरच्या पाठोपाठ जाणाऱ्या बसवरील चालकाचा ताबा सुटल्याने बसने अचानक कंटेनरला धडक दिली. या बसमध्ये ४० ते ४५ प्रवासी प्रवास करत होते. यातील ४० जखमी प्रवाशांवर जिल्हा सामान्य रुग्णालयात उपचार सुरु आहेत. दरम्यान अपघात कसा घडला याची नेमकी माहिती मिळाली नसून, पोलिसांकडून चौकशी केली जात आहे. जळगाव बसस्थानकातून भुसावळसाठी रवाना झालेल्या बसमध्ये जवळपास ४० ते ४५ प्रवासी होते. यात काही नशिराबाद येथील विद्यार्थी होते. अपघातस्थळी रुग्णवाहिका दाखल होऊन जखमींना बसमधून उतरवून जिल्हा रुग्णालयात आणले. यातील किरकोळ जखमींवर उपचार करण्यात आले. तर दोन प्रवासी गंभीर जखमी असून, त्यांचे सिटीस्कॅन करण्यात येणार आहे.
अपघाताची चौकशी करा- आ. भोळे
अपघाताची माहिती मिळताच आ. सुरेश भोळे यांनी जिल्हा रुग्णालयात भेट देऊन जखमींची विचारपूस केली. तसेच कुणालाही उपचाराशिवाय डिस्चार्ज देऊ नये अशा सुचना रुग्णालय प्रशासनास दिल्या आहे. या अपघाताची पोलिसांकडून चौकशी करण्यात येऊन दोषींवर कारवाई करण्याची मागणीही आ. भोळे यांनी केली आहे.
हेही वाचा :
- नगर : जिल्ह्यात केवळ चार कारखान्यांनाच परवाना ; अद्याप 20 साखर कारखान्यांना प्रतीक्षा
- हिंगोली : ग्रामस्थांनी चक्‍क गावच काढले विक्रीला; विविध मागण्या मंजूर होत नसल्याने घेतला निर्णय
- अकोले : दुचाकी चोरणारी टोळी केली गजाआड
The post जळगाव : भरधाव बसची कंटेनरला धडक, ४० प्रवासी जखमी appeared first on पुढारी.
