नाशिक : पुढारी वृत्तसेवा
उन्हाळी सुट्यांमुळे मूळ गावी ये- जा करण्यासह पर्यटनस्थळांना भेटी देण्यासाठी नागरिक घराबाहेर पडत आहेत. बसस्थानकांमध्ये गर्दी वाढल्याने प्रवाशांनी खासगी वाहतुकीकडे मोर्चा वळविला आहे. खासगी ट्रॅव्हल्स कंपन्यांनी हंगामी भाडेवाढ लागू केली आहे. त्यामुळे आंतरजिल्हा तसेच आंतरराज्यातील प्रवास महागला. खासगी ट्रॅव्हल्स कंपन्यांनी तिकीट दरात दुपटीने वाढ केल्याने प्रवाशांना आर्थिक झळ बसत आहे.
नाशिक येथून पुणे, कोल्हापूर, सोलापूर, मुंबई, लातूर, नागपूर, इंदूर, सुरत, अहमदाबाद आदी शहरांसाठी धावणाऱ्या खासगी ट्रॅव्हल्सच्या तिकीट दरात 30 टक्क्यांपर्यंत वाढ करण्यात आली आहे. मुंबई-पुणेसह इतर शहरांतून घरी परतण्यासाठी नोकरदार, विद्यार्थी तसेच महिलांची मोठी गर्दी होत आहे. औरंगाबाद, धुळे, नंदुरबार आदी मार्गांना प्रवाशांची पसंती आहे. वेगवेगळ्या ट्रॅव्हल्स कंपन्यांचे प्रवासभाडे मात्र त्यांच्या सर्व्हिसप्रमाणे ठरविण्यात आले असून, काही ठिकाणी त्यात वेळेवर वाढ केली जात असल्याच्याही तक्रारी आहे. दरम्यान, खासगी ट्रॅव्हल्सचालकांनी सर्वच मार्गांवर धावणाऱ्या खासगी बसगाड्यांचे प्रवासभाडे अवाच्या सव्वा वाढविले आहे. खासगी ट्रॅव्हल्स भाडेवाढीवर शासनाचे नियंत्रण नसल्याने बसमालकांचे चांगलेच फावत आहे. खासगी बस ट्रॅव्हल्स कंपन्यांकडून केली जात असलेली अवास्तव भाडे आकारणी थांबविण्याची मागणी प्रवाशांकडून केली जात आहे.
विविध मार्गांवर ट्रॅव्हल्सचे दर
मार्ग जुने दर सध्याचे दर
नाशिक – लातूर ९०० ११००
नाशिक – नागपूर ११०० १२००-१५००
नाशिक – सोलापूर ७०० ९००/१०००
नाशिक – कोल्हापूर ८०० ११००
नाशिक – अहमदाबाद ८०० १२००
नाशिक – सूरत ५०० ७००/८००
नाशिक – इंदूर ६०० ८००/१०००
नाशिक – गोवा १७०० २०००/२१००
नाशिक – बंगळुरू २२०० २५००/२८००
हेही वाचा:
- नाशिक : “त्या’ मुलांच्या प्रवासाचे गूढ कायम, तपासाचा अहवाल बालकल्याण समितीकडे
- Shivrajyabhishek Sohala | छत्रपती शिवाजी महाराज हे धैर्य आणि शौर्याचे प्रतिक! पंतप्रधान मोदींच्या शिवराज्याभिषेक दिनी मराठीतून शुभेच्छा
- Shri Ram Temple: अयोध्येतील श्रीराम मंदिराचे लोकार्पण २६ जानेवारीआधी
The post नाशिक : खासगी ट्रॅव्हल्स सुसाट; आंतरजिल्हा - आंतरराज्य प्रवास महागला appeared first on पुढारी.
