नाशिक (मालेगाव) : पुढारी वृत्तसेवा
यंदा पावसाने कहर केला आहे. गणेशोत्सवापासून सातत्याने पाऊस होत असून, त्यामुळे भूजल पातळी कमालीची उंचावून आता जलधारण क्षमताही राहिली नाही. परिणामी, पाऊस होताच ते प्रवाही होऊन नाल्यांना पूर आणि नद्या दुथडी भरून वाहू लागत आहेत.
सोमवारी (दि.19) दुपारनंतर संततधार झड लागल्याने सायंकाळी खडकी नाल्याने काठ सोडत सभोवतालचा परिसर कवेत घेतला. याच भागातील धरणही ओव्हरफ्लो झाल्याने पूरपाण्यात भर पडली आणि दरेगाव भागातील झोपडपट्टी पाण्याने वेढली गेली. अचानकनगर, मरियम पार्क, जिल्हा परिषद शाळात कंबरेपर्यंत पाणी वाहत होते. 40 ते 50 कुटुंबांचा संसार यामुळे उघड्यावर पडला. रात्री मदतकार्यासाठी आलेला जेसीबीदेखील पाण्यात उलटल्याचे सांगण्यात येते. त्यात कुणी जखमी झाले नाही. दरम्यान, बागलाणसह मोसम खोर्‍यातही पावसाची झड लागल्याने मोसम नदीचा जलस्तर अचानक वाढला. सांडव्या पुलावरून पाणी गेले. पुराने काठ सोडल्याने किल्ला झोपडपट्टी पाण्याखाली गेली होती. मंगळवारी सकाळपर्यंत पूर ओसरण्यास सुरुवात झाली होती.
अतिक्रमणाचा विषय ऐरणीवर
शहरातील मोठे नाले आणि गटारींवर मोठ्या प्रमाणात अतिक्रमण झाले आहे. शिवाय, या नाल्यांचा नागरिक व व्यावसायिकांकडून कचराकुंडीप्रमाणे उपयोग होतो. निम्मे नाले कचर्‍याने भरलेले त्यात प्लास्टिकचा भरणा यामुळे पाण्याचा अडथळा निर्माण होऊन पाणी तुंबते आणि परिसरात पसरते. काही ठिकाणी तर नाल्यांवरच पक्की बांधकामे झाली आहेत. याचा एकूणच परिणाम पाऊसपाणी व्यवस्थापनावर होतो.
सरासरी पर्जन्याने ओलांडली पातळी
तीन वर्षांपासून परिसरात अतिवृष्टी होत आहे. यंदादेखील मालेगाव तालुक्यात सरासरी पर्जन्याची (457.7 मिमी) पातळी ओलांडून सरासरीच्या 175 टक्के पाऊस झाला.
मंडळनिहाय दोन दिवसांत झालेले पर्जन्यमान (मिमी)
ठिकाण 18 सप्टेंबर 19 सप्टेंबर
मालेगाव 18 22
दाभाडी 15 7
अजंग 17 20
वडनेर 20 7
करंजगव्हाण 38 14
डोंगराळे 58 7
झोडगे 62 68
कळवाडी 25 20
कौळाने नि. 26 30
जळगाव नि. 30 28
सौंदाणे 20 7
सायने 19 57
निमगाव 40 55
एकूण 388 342
एकूण सरासरी 626.07 652.37
हेही वाचा:
- बेळगाव : विद्यार्थ्यांना पुन्हा आले युक्रेनमधून बोलावणे!
- रत्नागिरी : कोकणकन्या एक्स्प्रेस 20 जानेवारीपासून सुपरफास्ट!
- नगर : लष्करी जवानाची ऑनलाईन साडेआठ लाखांची फसवणूक
The post नाशिक : नाल्यांना पूर, झोपडपट्टीही पाण्यात appeared first on पुढारी.
