नाशिक : मुसळधार पावसामुळे सातपूरकरांची दाणादाण(फोटो)

नाशिक शहरासह सातपूर औद्योगिक वसाहती मध्ये गेल्या पाच दिवसांपासून संततधार पाऊस सुरु आहे. (काल दि. १०) सायंकाळी व रात्री पडलेल्या मुसळधार पावसाने सातपूरकरांची दाणादाण उडाली. मुसळधार पावसामुळे सातपूर- अंबड औद्योगिक वसाहती मध्ये जाणाऱ्या कामगारांचे चांगलेच हाल झाले.  नाशिक – त्र्यंबकरोड वरील श्रीराम सर्कल ते महिंद्रा सर्कल पर्यंत दुभाजकाच्या एका बाजूला पाणी साचले होते. रस्त्याला तलावाचे स्वरूप आले होते. पाण्यामध्ये दुचाकी व चारचाकी वाहने अडकून पडली होती. मनपाची सिटीलिंक बस देखील बंद पडली होती. यामुळे तब्बल दोन तास वाहतूक ठप्प होती.

आज सोमवार (दि. 11) सकाळी मनपाच्या बांधकाम विभागाने जेसीबी च्या साहाय्याने दुभाजक फोडून पाणी वाहण्यासाठी जागा केली. कामगार कामावर वेळेत जायचे असल्याने अशा स्थितीत देखील जीवमुठीत घेऊन मार्ग काढत होते. सातपूर औद्योगिक वसाहती मधील माळी कॉलनी, आयटीआय कॉलनी, श्रमिक नगर संत कबीर नगर, कामगार नगर, स्वारबाबा नगर, आदी व इतर भागात घरामध्ये पावसाचे पाणी शिरले. ड्रेनेज उफाळून आल्याने दूषित पाणी देखील रस्त्यावरून वाहत होते. सातपूर औद्योगिक वसाहती मधील काही कंपन्यांमध्ये देखील पाणी घुसले.