धुळे : पुढारी वृत्तसेवा
ईडीच्या धाकामुळे आम्ही बंड केल्याचा आरोप केला जातो आहे. मात्र हा आरोप खोटा आहे. माझी कोणतीही कंपनी नसून मी आजही 800 फुटाच्या घरामध्ये राहतो. त्यामुळे मला ईडीची कोणतीही भीती नसल्याचे सांगतानाच हिंदुत्वाशी फारकत घेतल्यामुळेच बंड केल्याचे प्रतिपादन राज्याचे मंत्री गुलाबराव पाटील यांनी केले आहे. यावेळी त्यांनी शिवसेना वाढीसाठी आपले योगदान असल्याने 32 वर्षे वयाच्या आदित्य ठाकरेंनी आरोप करू नये असा टोला देखील लगावला.
धुळ्यामध्ये दसरा मेळाव्याच्या निमित्ताने हिंदू गर्व गर्जना मेळाव्याचे आयोजन करण्यात आले. या निमित्ताने मार्गदर्शन करण्यासाठी राज्याचे पाणीपुरवठा मंत्री गुलाबराव पाटील यांचे आगमन झाले होते. यावेळी साक्रीच्या आमदार मंजुळाताई गावित, माजी आमदार चंद्रकांत रघुवंशी तसेच डॉक्टर तुळशीराम गावित, नंदुरबारचे वीरसिंग वसावे, सतीश महाले, मनोज मोरे, संजय गुजराती यांच्यासह अनेकांची उपस्थिती होती. या मेळाव्यात बोलताना मंत्री पाटील यांनी पुन्हा उद्धव ठाकरे यांच्यावर टीकास्त्र डागले आहे.
शिवसेनाप्रमुख बाळासाहेब ठाकरे यांच्या विचारापासून शिवसेना दूर जात होती. उद्धव ठाकरे यांनी काँग्रेस आणि राष्ट्रवादी बरोबर युती केल्याने हिंदुत्वाशी त्यांनी फारकत घेतली. त्यामुळे आम्ही उठाव केला आहे. शिवसेनेमुळे आम्ही मोठे झालो अशी टीका केली जाते. मात्र आम्ही देखील आंदोलने करीत खस्ता खाल्ल्या. शिवसेनेला वाढवण्यात योगदान दिले. हिंदुत्वाचा मुद्द्यावरून शिवसेना दूर जात होती. शिवसेनेच्या आमदार आणि पदाधिकाऱ्यांनी महाविकास आघाडी मधून बाहेर पडण्याचे उद्धव ठाकरे यांना वेळोवेळी सूचना केल्या. मात्र त्यांनी त्याकडे दुर्लक्ष केल्यानेच हा उठाव करावा लागला. आता ठाकरे यांच्या समर्थकांकडून आम्ही ईडीच्या धाकामुळे बाहेर पडल्याचा आरोप केला जातो .मात्र हा आरोप खोटा आहे. माझी कोणतेही कंपनी नाही. त्यामुळे मला ईडीला घाबरण्याचे कारणच नाही, असा टोला त्यांनी लगावला.
शिवसेनेला योगदान देत असताना आम्ही 35 वर्षांपासून खस्ता खाल्ल्या. मात्र आता 32 वर्षे वयाचे आदित्य कडून आमच्यावर गद्दार म्हणून टीका केली जाते. कोण आहेत हे आदित्य असा एकेरी उल्लेख करीत मंत्री पाटील यांनी आपला रोष व्यक्त केला. यावेळी त्यांनी धुळ्याचे सतीश महाले यांना विधानसभेच्या निवडणुकीसाठी आतापासून तयारी करण्याचे आवाहन करतानाच अप्रत्यक्षपणे धुळ्याची उमेदवारी जाहीर केली. यावेळी त्यांनी धुळे ग्रामीणचे माजी आमदार शरद पाटील यांच्यावर देखील टिकेची झोड उठवली. पाटील यांना विजयी करण्यासाठी मी 50 पेक्षा जास्त सभा घेतल्या. मात्र आज तेच पाटील विरोधाच्या भूमिकेत असल्याचा टोला त्यांनी लगावला. दरम्यान दसरा मेळाव्यात मुख्यमंत्री एकनाथ शिंदे यांचे विचार ऐकण्यासाठी धुळेकर शिवसैनिकांनी अवश्य हजेरी लावावी असे आवाहन देखील त्यांनी केले.
हेही वाचा :
- वेल्हे : जमिनीच्या ताब्यासाठी 30 लाखांची खंडणी; दोघांविरोधात गुन्हा दाखल
- पुणे : रिक्षावाले काकांचे वाहतूक नियोजन; प्रताप दगडे यांचे होतेय सर्वत्र कौतुक
- राज ठाकरे आज नाशिक दौऱ्यावर, शिर्डीसह सप्तशृंगी देवीचे घेणार दर्शन
The post Gulabrao Patil : मी आजही 800 फुटाच्या घरात राहतो, मला ईडीची भीती नाही appeared first on पुढारी.