मुंबई / नाशिक : पुढारी वृत्तसेवा
सिंहस्थ कुंभमेळ्यासाठी राज्य शासनाने जिल्हास्तरीय व राज्यस्तरीय संनियंत्रण समितीची घोषणा करावी. तसेच सिंहस्थ कुंभमेळ्यासाठी राज्य व केंद्र शासनाकडून निधी मिळण्यासाठी नाशिक – त्र्यंबकेश्वर येथील कामांचा सविस्तर प्रकल्प अहवाल तयार करण्यात यावा, अशी मागणी माजी उपमुख्यमंत्री छगन भुजबळ यांनी मुख्यमंत्री एकनाथ शिंदे व उपमुख्यमंत्री देवेंद्र फडणवीस यांच्याकडे केली आहे.
याबाबत भुजबळ यांनी मुख्यमंत्री व उपमुख्यमंत्री यांना दिलेल्या पत्रात म्हटले आहे की, सन २०२६ मध्ये नाशिक – त्र्यंबकेश्वरमध्ये सिंहस्थ कुंभमेळा होणार आहे. अवघ्या दोन-अडीच वर्षांवर येऊन ठेपलेल्या कुंभमेळ्याकरिता आवश्यक असलेल्या पायाभूत सुविधा निर्माण करण्यासाठी आतापासून तयारी केली, तरच कुंभमेळ्यापर्यंत ही कामे पूर्ण होतील. नाशिक शहराच्या पायाभूत सुविधांकरिता नाशिक महापालिकेने आणि त्र्यंबकेश्वरमधील सुविधांसाठी जिल्हाधिकारी कार्यालयाने सिंहस्थामधील कामांचे सूक्ष्म नियोजन करून सविस्तर प्रकल्प अहवाल तयार करण्याची आवश्यकता असल्याचे त्यांनी म्हटले आहे.
सिंहस्थ आराखड्यातील विविध कामांसाठी केंद्र आणि राज्य शासनाकडून निधी प्राप्त होत असतो. सिंहस्थ कुंभमेळ्यातील सर्वाधिक महत्त्वाचा प्रश्न साधुग्राम आणि अन्य विकासकामांसाठी भूसंपादनाचा असतो. त्यासाठी आतापासून नियोजन केले, तरच भूसंपादन करून त्या ठिकाणी कामे करता येतील. सिंहस्थ तोंडावर आल्यानंतर घाईघाईत कामे केली, तर त्या कामांना दर्जा राहात नाही. विकासकामे दर्जेदार आणि दीर्घकालीन होण्यासाठी ती विशिष्ट कालमर्यादेत होणे आवश्यक आहे. त्यामुळे सिंहस्थ कुंभमेळ्यासाठी राज्य शासनाने जिल्हास्तरीय व राज्यस्तरीय संनियंत्रण समितीची लवकरात लवकर घोषणा करावी. तसेच राज्य व केंद्र शासनाकडून निधी मिळण्यासाठी नाशिक – त्र्यंबकेश्वर येथील कामांबाबत सविस्तर प्रकल्प अहवाल तयार करण्याची कार्यवाही तातडीने व्हावी, अशी मागणी त्यांनी केली आहे.
हेही वाचा :
- बुडत्या पुण्याला केंद्राच्या निधीचा आधार ; पूर नियंत्रणासाठी मिळणार 250 कोटी
- महत्त्वाची बातमी ! अल-निनोबाबत मतभिन्नता ; भारतीय हवामान विभाग म्हणतो 1 जुलैपासून मान्सून सक्रिय
- बँकांचे गर्भश्रीमंत गुन्हेगार
The post सिंहस्थ कुंभमेळ्यासाठी संनियंत्रण समिती घोषित करा : छगन भुजबळ यांची मागणी appeared first on पुढारी.
