दहावीच्या विद्यार्थ्यांना चित्रकला परीक्षेच्या अतिरिक्त गुणांना मुकावे लागणार!

येवला (जि.नाशिक) : कोरोनाचा वाढता संसर्ग लक्षात घेता शासकीय रेखाकला (एलिमेंटरी व इंटरमीजीएट )परीक्षेचे आयोजन न करण्यासह सवलतीचे गुण या वर्षी देऊ नये असे आदेश शिक्षण विभागाने काढले आहे.यामुळे दहावीच्या विद्यार्थ्यांना यंदा रेखाकला परीक्षेच्या अतिरिक्त गुणांना यंदा कोरोनामुळे मुकावे लागणार आहे. यामुळे राज्य कला शिक्षक महासंघ आक्रमक झाला असून परिपत्रकाची होळीचा इशारा दिला आहे.

राज्य कला शिक्षक महासंघ आक्रमक
शासकीय एलिमेंटरी व इंटरमिजिएट या विद्यार्थी जीवनातील अत्यंत महत्त्वाच्या परीक्षा आहे.कला क्षेत्रामध्ये करिअर करण्यासाठी या परीक्षा म्हणजे महत्त्वाची पहिली पायरी असते.या परीक्षेतून मिळणाऱ्या गुणांमुळे विद्यार्थ्यांची दहावीची टक्केवारी वाढते.या संकट कालावधीत या परीक्षांची विद्यार्थ्यांसाठी गरज वाढलेली आहे.दरवर्षी राज्यात व राज्याबाहेर  लाखो विद्यार्थी या परीक्षा देत असतात.तसेच एलिमेंटरी व इंटरमिजिएट पास झालेल्या विद्यार्थ्यांना त्यांच्या श्रेणी नुसार दहावी बोर्डाच्या परीक्षेमध्ये वाढीव गुण मिळत असतात.मागील वर्षी अनेक विद्यार्थ्यांना या परीक्षांमुळे मिळणाऱ्या अतिरिक्त गुणांचा फायदा झाला परंतु परीक्षा घेतली गेली नाही तर विद्यार्थ्यांचे मोठे नुकसान होणार आहे. अगोदरच विद्यार्थ्यांना कोरोना संकट कालावधी मुळे प्रत्यक्ष शिक्षण मिळत नाही. त्यामुळे त्यांचा गुणांचा टक्का घसरण्याची शक्यता वाटते.

हेही वाचा - पहिल्‍या दिवशी पॉझिटिव्ह कोरोना रिपोर्ट; दुसऱ्या दिवशी निगेटिव्ह! हा तर जिवासोबत खेळ  

नियमांचे पालन करून या परीक्षा घेण्याची मागणी
दहावी व बारावीच्या परीक्षा होणार आहेच, त्यामुळे शासकीय कला परीक्षांचे नियोजन होणे गरजेचे आहे. मागील वर्षी अनेक विद्यार्थ्यांनी इलेमेंटरी परीक्षा दिलेली आहे.त्यांना यावर्षी इंटरमिजिएट परीक्षा द्यायची आहे. तसेच अनेक नवीन विद्यार्थ्यांना एलिमेंट्री परीक्षा द्यायची आहे. त्यांची घरी बसून तयारीही चालू आहे. परंतु परीक्षांबाबत शासनाकडून घेतलेला निर्णय अत्यंत दुर्दैवी आहे. इतर परीक्षासोबत शासकीय चित्रकला परीक्षा ही घेतल्या पाहिजे. परीक्षांसाठी आवश्यक सर्व नियमांचे पालन करून या परीक्षा घेण्यात याव्यात अशी मागणी अगोदरपासून होत आहे.

हेही वाचा - सख्ख्या भावांची एकत्रच अंत्ययात्रा पाहण्याचे आई-बापाचे दुर्देवी नशिब; संपूर्ण गाव सुन्न 

सवलतीच्या गुणांपासून वंचित
मात्र विद्यार्थी व शिक्षकांच्या मागणीकडे दुर्लक्ष करून शासनाच्या तंत्रशिक्षण विभागाने इयत्ता दहावी मधील कलाप्रेमी विद्यार्थी व विद्यार्थिनींना सवलतीचे वाढीव कलागुण देण्याबाबत कटू निर्णय घेतला आहे. शासकीय एलिमेंटरी व इंटरमिजिएट परीक्षा पास झालेल्या विद्यार्थ्यांना या वर्षाचे सवलतीचे वाढीव गुण इयत्ता दहावी मध्ये देण्यात येऊ नये अशा पद्धतीने शासन परिपत्रक काढण्यात आले आहे. या परिपत्रकामुळे महाराष्ट्रातील सात ते आठ हजार विद्यार्थी या कला सवलतीच्या गुणांपासून वंचित राहणार आहेत. ही बाब गंभीर असून राज्य कला शिक्षक महासंघाने याचा निषेध केला असून हा निर्णय तातडीने मागे घेण्याची मागणी केली आहे. 

लेखी आदेश काढणे म्हणजे हा अन्याय
विद्यार्थी हितासाठी विद्यार्थ्यांनी प्रत्यक्ष एलिमेंटरी व इंटरमिजिएट या परीक्षा इयत्ता सातवी ते दहावीपर्यंत केव्हाही दिलेल्या असतात. मात्र एकीकडे कोरोनाच्या नावाने या परीक्षा झाल्या नाहीत. या कारणाने विद्यार्थ्यांना कला गुण हे सवलतीचे देण्यात येऊ नये हा अतिशय चुकीचा निर्णय घेतला गेला आहे.वास्तविक एलिमेंटरी व इंटरमिजिएट परीक्षा ज्या विद्यार्थ्यांनी पास केल्या आहेत त्यांचे प्रस्ताव तंत्रशिक्षण मंत्री यांच्याच कलागुण वाढीव प्रस्ताव मुदतवाढ देण्याच्या पत्रावरून तमाम शाळांनी बोर्डाकडे असे प्रस्ताव मुदतीत सादर केलेले आहेत आणि आता अशाच प्रस्तावांना वाढीव कलागुण देण्यात येऊ नये असा लेखी आदेश काढणे म्हणजे हा अन्याय असल्याचे शिक्षकांचे म्हणणे आहे.

 

"विद्यार्थ्यांवर अन्यायकारक असलेले हे परिपत्रक येत्या तीन दिवसात तातडीने मागे घ्यावे अन्यथा संपूर्ण विद्यार्थ्यांच्या हितार्थ महाराष्ट्र राज्य कला शिक्षक महासंघ या शासनाच्या परिपत्रकाची होळी नक्कीच करेल.या निर्णयामुळे अनेक विद्यार्थी हक्काच्या गुणांना मुकणार आहे."-प्रल्हाद साळुंके,प्रदेश सरचिटणीस,राज्य कला शिक्षक महासंघ

 

"शासकीय चित्रकला परीक्षा प्रमाणपत्रांचा अनेक क्षेत्रांमध्ये उपयोग होतो.
त्याचबरोबर दहावीला श्रेणीनुसार वाढीव गुण मिळतात.कोरोना संकटामुळे आजमितीस विद्यार्थ्यांना या परीक्षा सहाय्यक ठरू शकतात.म्हणून परीक्षा घेण्याची आम्ही सतत मागणी करत आहोत.तरीही परीक्षा न घेणे व गुण न देण्याचा निर्णय घेतल्याने अन्याय झाला आहे. हा निर्णय त्वरित मागे घ्यावा."
-दत्तात्रय सांगळे,जिल्हाध्यक्ष,राज्य कला शिक्षक महासंघ,नाशिक