नाशिक (इगतपुरी) : पुढारी वृत्तसेवा
तहसील कार्यालयाने आदिवासी, कष्टकर्‍यांना दोन वर्षांपूर्वी रेशनकार्ड दिली. मात्र रेशनकार्डची नावे ऑनलाइन दिसत नसल्याने आदिवासी कष्टकरी रेशनच्या धान्यापासून वंचित राहिले. अनेक वेळा पुरवठा विभागात तक्रार करूनही थातूरमातूर उत्तर मिळत असल्याने अखेर एल्गार कष्टकरी संघटनेने तहसील कार्यालयासमोर आंदोलन केले.
रेशनकार्ड टोपलीत सजवून बोरटेंबे ते तहसील कार्यालयापर्यंत सवाद्य मिरवणूक काढली. त्यानंतर तहसील कार्यालयाच्या प्रवेशद्वारावर संघटनेच्या महिला सदस्यांनी जागरण गोंधळ घालत रेशनकार्ड पूजन करून तहसीलदारांना भेट देण्यात आले. उच्च न्यायालयाने आदिम कातकरी कुटुंबाला तत्काळ रेशनकार्ड देऊन धान्य द्यावे, असे आदेश दिले होते. त्यानुसार पुरवठा कार्यालयाकडून कातकरी कुटुंबाला रेशनकार्ड दिले. मात्र त्यांना धान्य दिले जात नसल्याची आंदोलनकर्त्यांची तक्रार आहे. ज्या कुटुंबाला कार्ड दिले आहेत त्यांना तत्काळ धान्य देण्यात यावे, अशी मागणी करण्यात आली. या आंदोलनात एल्गार कष्टकरी संघटनेचे अध्यक्ष भगवान मधे, संतोष ठोंबरे, गणपत गावंडा, तानाजी कुंदे, राजू भगत, बाळू उघडे, काळू भस्मे, मंगल खडके, नवनाथ निबकेर, वसंत इरते, मथुरा भगत, रोहिणी चव्हाण, लता मेंगाळ, काळू निरगुडे आदींसह शेकडो कायकर्ते उपस्थित होते.
पुरवठा विभागावर कारवाई करा
पुरवठा विभागाकडून उच्च न्यायालयाच्या आदेशाची पायमल्ली झाली असून रेशनकार्ड असूनही ऑनलाइन एन्ट्री झाली नाही. त्यांना धान्य दिले नाही म्हणून पुरवठा अधिकारी व संबंधित अधिकार्‍यांवर न्यायालयाचा अवमान केला म्हणून कारवाई करावी, अशी मागणी केली.
हेही वाचा:
- जर्मन मासिकात भारताच्‍या लोकसंख्‍या वाढीवर आपेक्षार्ह व्‍यंगचित्र, मंत्री चंद्रशेखर म्‍हणाले…
- Stock Market Opening : सलग दुसऱ्या दिवशीही बाजार सपाट; बजाज ऑटो, सिप्लाचे शेअर्स घसरले
- महाराष्ट्रात हत्ती संवर्धनासाठी श्रीलंकेचे ‘रोल मॉडेल’
The post नाशिक : ‘एल्गार कष्टकरी’ आंदोलन; रेशनकार्ड टोपलीत सजवून सवाद्य मिरवणूक appeared first on पुढारी.
